މަސްތުވާތަކެތި ވިއްކުމާއި ބެހެއްޓުމުގެ ދައުވާއަށް ޗިކާ އިންކާރުކޮށްފި

އިއްޔެ، 17:40 0 ޚިޔާލު

މާރޗް މަހުގެ ތެރޭގައި މަސްތުވާ ތަކެއްޗާއެކު ފުލުހުން އަތުލައިގަތް އިބްރާހީމް ނާފިޒް, (ޗީކާ) ގދ. ނަޑައްލާ, އަތަމާގެ, 29, މައްޗަށް ކުރެވޭ މަސްތުވާތަކެތީގެ ވިޔަފާރި ކުރުމާއި އަތުގައި ބެހެއްޓުމުގެ ދައުވާ އަށް އޭނާ އިންކާރު ކޮށްފި އެވެ.

މިއަދު އޮތް ޝަރީއަތުގެ މަޖުލީހުގެ ދައުލަތުގެ ފަރާތުން އޭނާގެ މައްޗަށް ކުރާ މަސްތުވާތަކެތީގެ ވިޔަފާރި ކުރުމާއި އެތަކެތި ގެންގުޅުމުގެ ދައުވާއަށް އިންކާރުކޮށް އޭނަ ބުނެފައި ވަނީ އޭނާގެ ކޮޓަރި ތެރެއިން ފެނުނު މަސްތުވާތަކެތި އޭނާއަށް ފެނިފައި ވަނީވެސް ފުލުހުން ދެއްކުމުން ކަމަށާއި އެ ތަކެއްޗަކީ ކާކުގެ ކޮން އެއްޗެއް ކަމެއް އޭނައަށް އެނގިފައި ނުވާ ކަމަށެވެ.

މީގެ އިތުރަށް ޗިކާ ވަނީ ވަކީލެއް އަންޔަން ކުރުމުގެ ފުރުސަތަކަށްވެސް އެދިފަ އެވެ.

މިއަދުގެ ޝަރީއަތުގެ ޗިކާގެ ތަހުގީގު ބަޔާންވެސް ވަނީ އިއްވާފަ އެވެ. މިއަހަރުގެ މާރޗް 24 ވަނަ ދުވަހު ދީފައިވާ ބަޔާނުގައި ބުނެފައި ވަނީ 800ރ ދީފައި ރޭޑިއަމް ފިހާރައިން އޭނަ ގަނެފައިވާ ކަނޑިއެއް އެގޭ ތެރެއިން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި އެތަނުން ފެނުނު މަސްތުވާ ތަކެތި ކަމަށް ޝައްކު ކުރެވޭ ދިހަ ބުލެޓަކީ އޭނާގެ އެއްޗެއް ނޫން ކަމަށާއި އެތަކެތީގެ ވެރިފަރާތް ކަމަށް ޝައްކު ކުރެވޭ ވަރަށް ގިނަ ބަޔަކު އެބަތިބި ކަމަށާއި އެ މީހުންގެ ނަންތައް އެހެން ބަޔާނެއްގައި ދޭނެ ކަމަށެވެ.

ޗިކާ ހައްޔަރު ކޮށްފައި ވަނީ މާރޗް މަހުގެ 21 ވަނަ ދުވަހުގެ ރޭ މާރާމާރީ ތަކާ ގުޅިގެން ފުލުހުން ހިންގި ހާއްސަ އޮޕަރޭޝަނެއްގަ އެވެ. ފުލުހުން އޭނާ ހައްޔަރުކޮށް އޭނާގެ ހަށިގަނޑާއި އެ ކޮޓަރި ފާސްކުރި ކުރުމުގައި އޭނާގެ އަތުން 10 ޕެކެޓް މަސްތުވާ ތަކެއްޗާއި 30 ހާހަށް ވުރެ ގިނަ ރުފިޔާގެ ނަގުދު ފައިސާ އާއި ގިނަ އަދަދެއްގެ ދިވެހި ފައިސާގެ ޗެކްތަކެއް ފުލުހުންގެ ބެލުމުގެ ދަށަށް ގެންގޮސްފައިވެ އެވެ.