ި
ވަޒީފާއާއިބެހޭ ޤާނޫނުގައި ރިޒޯޓްތަކުގައި މަސައްކަތްކުރާ މުވައްޒިފުންނަށް ލިބެންޖެހޭ ގިނަގުނަ ހައްޤުތަކެއް ނުލިބޭކަމަށާއި، އެޤާނޫނުން އެކަށީގެންވާ ގޮތެއްގައި ރިޒޯޓްތަކުގައި މަސައްކަތްކުރާ މުވައްޒިފުން ޙިމާޔަތް ކުރެވިފައި ނުވާކަމަށްބުނެ ފަސްހާހަށްވުރެގިނަ މުވައްޒިފުންގެ ސޮޔާއެކު މިއަދު މިނިސްޓްރީ އޮފް ޓޫރިޒަމް އެންޑް ސިވިލްއޭވިއޭޝަން އަށް ޕެޓިޝަނެއް ހުށަހަޅައިފިއެވެ.
ޓޫރިޒަމް މިނިސްޓްރީގައި ބޭއްވި ބައްދަލު ވުމެއްގައި ރިޒޯޓް މުވައްޒިފުންގެ ފަރާތުން 11މުވައްޒިފަކު ބައިވެރިވިއެވެ. މި ޕެޓިޝަން ހުށަހަޅުއްވަމުން މި މުވައްޒިފުން ދެއްކެވި ވާހަކާގައި ވަޒީފާއާއިބެހޭ ޤާނޫނުގައި ރިޒޯޓްތަކުގައި މަސައްކަތްކުރާ މުވައްޒިފުންނަށް ލިބެންޖެހޭ ގިނަގުނަ ޙައްޤުތައް ޙިމާޔަތްކުރެވިފައިނުވާކަމީ، ރިޒޯޓްތަކުގައި މަސައްކަތް ކުރައްވާ ހުރިހާ މުވައްޒިފުން ކަންބޮޑުވެ ހިތާމަކުރާކަމެއްކަން ފާހަގަކޮށް، އެކަމުގައި މިނިސްޓްރީ އޮފް ޓޫރިޒަމް އެންޑް ސިވިލްއޭވިއޭޝަން އިން މަސައްކަތްކޮށްދެއްވުމަށް އެދިވަޑައިގަތެވެ. އަދި ރިޒޯޓްތަކުގައި މަސައްކަތްކުރާއިރު މުވައްޒިފުންނަށް ދިމާވާ ބައެއް ދަތިތައްވެސް ފާހަގަކުރެއްވިއެވެ.
އެގޮތުން ފާހަގަކުރި ކަންތައްތަކުގެ ތެރޭގައި ވަޒީފާއަދާކުރަންޖެހޭ ގަޑި ދިގުކަމާއި، ވަޒީފާގެ ގެރެންޓީނެތްކަމާއި، އެކަށީގެންވާ ގޮތެއްގައި ޗުއްޓީދެވޭނެ ނިޒާމެއް ޤާއިމްވެފައިނެތްކަމާއި، ރިޒޯޓްގައި މުވައްޒިފުންގެ ތިބުމާއި ކެއުމާއި ދިމާވާ ދަތިތަކާއި، ދިރިއުޅުމުގެ ޚަރަދު ބޮޑުވަމުންދާއިރު މުސާރަ ކުޑަކަންވެސް ފާހަގަކުރައްވާފައި ވެއެވެ. އަދި އެއްވަޒީފާއެއް އެއްފެންވަރެއްގައި އަދާކުރަމުންދާ ދިވެހިންނާއި، އެވަޒީފާއަދާކުރަމުންދާ ބޭރުމީހުންނާ ތަފާތުތަކެއް ގެންގުޅޭކަމާއި، މުވައްޒިފުންނަށް ސަރވިސްޗާޖް ދިނުމުގައި މޮނިޓަރކުރެވޭނެ ނިޒާމެއް ނެތުން މުވައްޒިފުން ފާހަގަކުރައްވާފައި ވެއެވެ. މިގޮތަށް ފާހަގަކުރެއްވި ކަންތައްތަކަކީ ހުރިހާ ރިސޯޓްތަކެއްގައި ހިނގާކަންތައްތައް ނޫންކަމަށާއި، ވަރަށްރަނގަޅަށް މުވައްޒަފުންނަށް ކަންތައްތައް ކޮށްދޭ ރިޒޯޓްތައް އެބަހުރިކަންވެސް ފާހަގަކުރައްވާފައި ވެއެވެ.
މިނސްޓަރ އޮފް ޓޫރިޒަމް ދެއްކެވި ވާހަކާގައި ވަޒީފާއާއިބެހޭ ޤާނޫނެއްގައި ޓޫރިސްޓް ރިޒޯޓްތަކުގައި މަސައްކަތްކުރާ މީހުންނަށް ލިބެންޖެހޭ ބައެއް ހައްޤުތައް ޙިމާޔަތްކުރެވިފައި ނުވާކަން މިނިސްތްރީން ފާހަގަކޮށް، އެކަންވަނީ ސަރުކާރުގެ ކަމާއިބެހޭ ފަރާތްތަކަށް ހުށަހަޅާފައި ކަމަށާއި، އަދި ޤާނޫނަށް އިސްލާޙް ގެނައުމަށްޓަކައި މިހާރު ސަރުކާރުން މަޖިލީހަށް ހުށަހަޅުއްވާފައިވާކަންވެސް ފާހަގަކުރެއްވިއެވެ. އަދި މަޖިލީހުން ޤާނޫނު އިސްލާޙްކުރައްވާ ނިމޭއިރު އެ ހުރިހާ ކަމަކަށް އިސްލާޙްތަކެއް އަންނާނެކަމަށް ދެކެވަދައިގަންނަވާ ކަންވެސް މިނިސްޓަރގެ ވާހަކަފުޅުގައި ފާހަގަކުރެއްވިއެވެ. މުވައްޒިފުން ހުށަހެޅުއްވި ކަންތައްތައް އިސްލާޙްކުރެވޭތޯ، މިނިސްޓްރީއަށް ކުރެވެންއޮތް ހުރިހާ މަސައްކަތެއް ކޮށްދެއްވުމަށް މަސައްކަތްކުރައްވާނެކަމުގައިވެސް މިނިސްޓަރގެ ވާހަކަފުޅުގައި ވިދާޅުވިއެވެ.
No comments:
Post a Comment