24 October 2007 | Rania
މިއަހަރު ނިމުމުގެ ކުރިން ފަސް އަތޮޅެއްގައި ވައިގެ ބަނދަރަކާއެކު ހޮޓަލެއް ނުވަތަ ރިޒޯޓެއް އަދި ޔޮޓްމެރީނާއެއް ހިމެނޭގޮތަށް، ތަރައްޤީކުރުމަށް ބީލަމަށް ހުށަހެޅޭނެ ކަމަށް މިނިސްޓަރ އޮފް ޓޫރިޒަމް ޑރ މަހުމޫދު ޝައުގީ ވިދާޅުވެއްޖެއެވެ.ބަޑޮސްއައިލެންޑް ރިސޯޓްގައި އިއްޔެ ބޭއްވި ދިވެހިރާއްޖެއާއި، ސިންގަޕޫރުގެ ފިޔަފާރިވެރިންގެ ސެމިނާރަށްފަހު މީޑިއާއަށް މަޢުލޫމާތުދެއްވަމުން ޝަޢުޤީ، ވިދާޅުވީ ރާއްޖޭގެ ރަށްރަށުގައި ޓޫރިސްޓް ރިޒޯޓްތަކާ ވައިގެ ބަނދަރު ހެދުމަށް ނިންމަވަނީ ސަރުކާރުގެ ކަމާބެހޭ އިދާރާތަކާއި އެކަންކަމަށް ޚާއްޞަ ކުރެވިފައިވާ ކޮމެޓީތަކުގައި މަޝްވަރާކުރައްވައިގެން، ދިރާސާ ކުރެއްވުމަށް ފަހުގައި ކަމަށެވެ.އެގޮތުން މިހާރު ވަނީ ހުވަދުއަތޮޅު އުތުރުބުރީ ވިލިގިލީގެ ފަޅުތެރެ ހިއްކައިގެން ވައިގެ ބަނދަރު ހެދުމަށް ނިންމަވާފައި ކަމަށާއި މި ގޮތަށް ނިންމަވާފައިވަނީ ގިނަ ބަޔަކަށް އެކަމުން ފައިދާވާނެކަމަށް ބައްލަވައިގެންކަމަށް ޝައުޤީ، ވިދާޅުވިއެވެ. އިއްޔެ ބަނޑޮހުގައި ބޭއްވި މިބައްދަލުވުމުގައި ޓޫރިޒަމް މިނިސްޓްރީން ހުށަހެޅި ޕްރެޒެންޓޭޝަންގައިވާ ގޮތުން 1200 މީޓަރުގެ ރަންވޭއަކާ އެކު އެއާރޕޯޓް ތަރައްގީކުރާނެ ފަސްރަށުގެ ގޮތުގައި ހަމަޖައްސަވާފައިވަނީ ނ. މާފަރާއި، ރ، އިހުރާއި، ބ. ދަރަންވަންދު، ވ. ބޮޑުމޮހޮރާ، އަދި ޏ. ފުވައްމުލަކެވެ.އެއާރޕޯޓް ހަދާ ރަށުގައި 200 އެނދުގެ ހޮޓަލުގެ އިތުރުން 25 ފާލަމުގެ ޔޮޓް މެރީނާއެއް ހިންގުމުގެ ފުރުސަތު އެއާރޕޯޓް ހިނގާ ފަރާތްތަކަށް ލިބިގެންދާނެއެވެ. އެއާޕޯޓް ހަދާ ފަރާތްތަކަށް 200 އެނދުގެ ރިސޯޓެއް ތަރައްގީކުރުމުގެ ފުރުސަތުހުޅުވިގެންދާނެ ކަމަށާއި އެއީ ނ. ހުވަނދުމާ ވައްޓަރާއި، ރ. ގާއުގޫނދޫ، ބ. މުއްދޫ، މިހާރު މީހުންދިރިއުޅޭ ރަށެއް ކަމަށްވާ ވ. ރަކީދޫ އަދި ގއ. ދިގުރަށުން ކަމަށްވެސް ވިދާޅުވިއެވެ.
No comments:
Post a Comment