ހެރެތެރެ ރިސޯޓުގެ ވަޒީފާތަކަށް ބިދޭސީ ގެންނާތީ އައްޑޫ މުވައްޒިފުން ނުރުހުން ފާޅުކުރަން ފަށައިފި

23 October 2007 | Ibrahim Zaki

އައްޑުއަތޮޅު ހެރެތެރޭގައިހަދާނިމި އަންނަމަހު ހުޅުވުމަށް މިހާރު ތައްޔާރުވެފައިވާ އެމް.ޓީ.ޑީ.ސީގެ ހެރެތެރެ ރިސޯޓުގެ ވަޒީފާތަކަސް ގިނަޢަދަދެއްގެ ބިދޭސީން ގެންނަކަމަށްބުނެ އެތަނުގައި މިހާރު ވަޒީފާ އަދާކުރަމުންދާ އައްޑޫ ރައްޔިތުން ނުރުހުން ފާޅުކުރަން ފަށައިފިއެވެ.އިރު އޮބްޒާވަރަށް މަޢުލޫމާތު ދެއްވަނުން ހެރެތެރެ ރިސޯޓުގައި ވަޒީފާ އަދާކުރާ އައްޑޫ މީހަކު ބުނީ އިއްޔެވެސް އެ ރިސޯޓުގެ އެކި ވަޒީފާތަކަސް ގިނަ ބިދޭސީންތަކެއް ގެނަސްފައިވާކަމަށެވެ. އަދި މިހާރުވެސް އެ ރިސޯޓުގައި ވަޒީފާ އަދާކުރަމުންދާ ދިވެހިންގެ ތެރެއިން ގިނަ މީހުން މަސައްކަތް ކުރަމުންދަނީ ރޫމްބޯއީ، ވޭޓަރ، ފަދަ ދަށް ވަޒީފާތަކުގައި ކަމަށާއި، މަތީ ވަޒީފާތަކުގައި މަސައްކަތްކުރަމުންދަނީ ބިދޭސީންކަމަވެސް އެ ރިސޯޓުގައި ވަޒީފާ އަދާކުރާ އެހެންމީހަކު އިރު އޮބްޒާވަރަށް ކިޔައިދިނެވެ. އޭނާބުނީ ހެރެތެރެ ރިސޯޓުގެ މުސާރަތަކަކީވެސް ވަރަށްކުޑަ މުސާރަތަކެއްކަމަށެވެ. އެއީ ބިދޭސީންނަށް ބޮޑަށް ވަޒީފާގެ ފުރުސަތު ދިނުމަށް ކޮށްފައިވާ ކަމެއް ކަމަސްވެސް އޭނާ ބުންޏެވެ."ވޭޓަރަކަށްވެސް ދެހާހެއްހާ ރުފިޔާ މިލިބެނީ އެއީ ވަރަށްކުޑަ މުސާރައެއް. އެހެންކަމުން އަހަންނެއް ނުދެކެން މިއީ އައްޑޫ ރައްޔިތުންނަށް ފުރުސަތު ހޯދައިދޭން ހަދައިދިން ތަނެއްކަމަކަށް، އެވަރުގެ މުސާރައަކީ ބޭރު މީހުންނަށް ކަނޑައަޅާ މުސާރައެއް އަހަރެމެންނަކަށް އެވަރަކުން ދިރިއުޅުން ފުއްދައެއްނުލެވޭނެ" އިރު އޮބްޒާވަރަށް ކިޔައިދެމުން ހެރެތެރޭގެ ވޭޓަރެއްގެ ވަޒީފާގައިއުޅޭ މުހައްމަދު ކިޔައިދިނެވެ.މިދިޔަ ހޮނިހިރު ދުވަހު ގަމު ދޫގަހުގައި، ހެރެތެރެ އާއިބެހޭ މަޢުލޫމާތު ދެއްވަމުން އެމް.ޓީ.ޑީ.ސީގެ މެނެޖިންގ ޑިރެކްޓަރ މުޙައްމަދު ސޯލިޙު ވިދާޅުވެފައިވަނީ، ރިސޯޓު ހުޅުވިގެން ފުރަތަމަކޮޅު އަންނަ ފަތުރުވެރިންގެ އިތުބާރު ހޯދުމަށް ރިސޮޓުގެ ބައެއް އިސްމަޤާމުތަކުގައި ޕްރޮފެޝަނަލް ބޭރުމީހުން ތިބުމަކީ އެކަށީގެންވާ ކަމެއް ކަމުގައެވެ. އެއީ ހަމައެކަނި ފަތުރުވެރިންގެ އިތުބާރު ރިސޯޓަށް ލިބެންދެން ހަމަޖެހިފައިވާ ގޮތެއްކަމަށާއި، އެހެން އެކަން އޮތްކަމުގައި ވީނަމަވެސް އެދަނުގެ ކޮންމެ ދާއިރާއެއްގައި ވަޒީފާ އަދާކުރާ ދިވެހިންނަށް އެ ދާއިރާއެއްގެ އިސްމަޤާމަށް އައުމުގެ ފުރުސަތު އޮންނާނެ ކަމަށްވެސް ވިދާޅުވިއެވެ." ބައެއް ވަޒީފާތަކަށް ބޭރުމީހުން ގެންނަނީ ފުރަތމަކޮޅުގައި ރިސޯޓުންދެވޭ ޚިދުމަތުގެ ފެންވަރު ރަނގަޅުކޮށް ފަތުރުވެރިންގެ އިތުބާރު ހޯދުމަށް، ނަމަވެސް ކޮންމެ ދިވެއްސަކަށްވެސް އެމީހަކު އުޅޭ ދާއިރާއިން މަސައްކަތް ކޮށްގެން ކުރިއަށްދެވޭގޮތަށް ހަމަޖެހިފަ އޮންނާނީ، ރަނގަޅަށް ވަޒީފާ އަދާކުރެވޭކަމުގެ އިތުބާރު ލިބުނުހާއަވަހަކަށް، ކޮންމެ މީހަކުވެސް މަތީވަޒީފާތަކަށް ބަދަލު ކުރެވެމުންދާނީ" ސޯލިޙް ވިދާޅުވިއެވެ.ސޯލިޙް ވިދާޅުވީ އެ ރިސޯޓުގެ ވަޒީފާތަކުގައި މިވަގުތު ބިދޭސީން އުޅުނު ކަމުގައި ވީނަމަވެސް އެއްއަހަރު ދުވަހުގެ ތެރޭގައި އެތަނުގެ ވަޒީފާތައް ސަތޭކަ ޕަސެންޓް ދިވެހިންނަށް ބަދަލުވެގެން ދާނެކަމަށެވެ. އެކަމަށް ޓަކައި އަމާޒު ކުރެވިގެން ޓްރެއިނިންގ ޕްރޮގްރާމްތަކާއި ތަފާތު ޕްރޮގްރާމްތައް ހިންގަމުންދާކަންވެސް އޭނަ ފާހަގަ ކުރެއްވިއެވެ.ހެރެތެރޭގައި މަސައްކަތްކުރާ ބައެއް ދިވެހިން ބުނީ އެތަނުން ލިބޭ މުސާރައަށްބަލައި، އެހެންހިސާބުތަކުގައި ވަޒީފާ އަދާކުރަމުންދާ އައްޑޫ މީހުން އެތަނުގެ ވަޒީފާތަކަށް އައުން ވަރަށް ދުރުކަމަށެވެ. އެއީ އެމީހުންނަށް އެމީހުން މިހާރު އުޅޭ ރިސޯޓުތަކުން ރަނގަޅު އާމްދަނީއެއް ލިބޭނެތީކަންވެސް އޭނަ ފާހަގަކުރިއެވެ. "އެހެން ތަންތަނުގަ ވަޒީފާ އަދާކުރާ މީހުންގެ ތެރޭން ރަށަށް އަންނަން ބޭނުންވާ މީހުންނަށް އައިސް އުޅެވޭވަރު މުސާރައެއްނޫން މިތަނުން ދެނީ މާކުޑަ މުސާރައެއްދެނީ. އަހަންނަކަސް ހިއެއްނުވޭ. އައްޑުއަށް ދިރިއުޅުން ބަދަލުކުރަން ބޭނުންވެފައިތިބި މީހުނަށް އެކަން ކުރެވޭވަރުގެ މުސާރައެއްކަމަކަށް މިދެނީކީ، އެހެންވީމަ އަހަންނަށް ބުނެވޭނީ، މިއީ އަހަރެމެންނަށް ކޮށްދިންކަމެއް ނޫނަކަމަށް" އަޒުހަރު އިރު އޮބްޒާވަރަށް ކިޔައިދެމުން ބުންޏެވެ.ތަންކޮޅެއް ކުރިން ނޫސްވެރިންނަށް މަޢުލޫމާތު ދެއްވަމުން އެމް.ޓީ.ޑީ.ސީ، ގެ ޗެއަރމަން ޗަމްޕާ ޢަފީފު ވިދާޅުވެފައިވަނީ، ހެރެތެރެ ރިސޯޓުގައި މަސައްކަތްކުރާ މިވައްޒިފުންނަށް މުސާރަ ހަމަޖައްސާފައިވަނީ ކުރިއެރުން ލިބޭގޮތަށް ކަމަށެވެ. އަދި ކުއްލިއަކަް ބޮޑުމުސާރައެއް ހަމަޖެއްސުމުން އެހެން ރިސޯޓުތަކުގައި ވަޒީފާ އަދާކުރާ މީހުންތައް އެތަންތަނުން ކެނޑިއެން އެއްފަހަރާ އައިސްފިނަމަ، އެތަންތަނަށް ދިމާވާނެ ގެއްލުމެއްގެ ސަބަބުން މުޅި އިންޑަސްޓްރީއަށް އެކަމުގެ އަސަރު ފޯރައިފާނެކަމަށެވެ. ރިސޯޓުތަކުގައި ވަޒީފާ އަދާކުރާ މީހންގެ ބޮޑު ބަޔަކީ އައްޑޫ މިހުންކަން ފާހަގަ ކުރައްވައި، ހެރެތެރެ ރިސޯޓުން ވަޒީފާ އަދާކުރާ ފަރާތްތަކަސް ކަނޑައަޅާފައިވާ މުސާރަތަކަކީ، އަލަށް ވަޒީފާއަށް އަންނަ ފަރާތްތަކަށްވެސް ތަޖުރިބާ އާއި ތަމްރީން ހޯދައިގެން ކުރިއެރުންތައް ލިބޭނެފަދަ މުސާތައެއްކަމަށްވެސް ވިދާޅުވެފައިވެއެވެ.އައްޑޫ ހެރެތެރެ ރިސޯޓުނިމިފައިވާ އިރު އެ ރިސޯޓަށް އަންނަ ފަތުރުވެރިންގެ ފުރަތަމަ ގްރޫޕު އަންނަ މަހުގެ 7 ވަނަ ދުވަހު އައްޑުއަށް އައުމަށް ވަނީ ހަމަޖެހިފައެވެ. ގަމު ބައިންއަޤުވާމީ ވައިގެ ބަނދަރަށް ބައިނަލް އަޤްވާމީ ދަތުރުތައް ފެށުމާއި، ރިސޯޓް ހުޅުވުންވެސް އެދުވަހު އޮންނާނެއެވެ.