އަހުމަދު މޫސާ 
ހަވީރު، 17:02 
0 ޚިޔާލު 
އިންޑިޔާ ސަރުކާރުގެ ހިލޭ އެހީގައި އިމާރާތް ކުރާ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒް (ހޮޓެލް ސުކޫލް) ގެ އާ އިމާރާތުގެ މަސައްކަތް 18 މަސްދުވަހުގެ ތެރޭގައި ނިމޭވަރު ވާނެކަމަށް މޯލްޑިވްސް ކޮލެޖް އޮފް ހަޔަރ އެޑިޔުކޭޝނުން ބުނެފި އެވެ.
މޯލްޑިވްސް ކޮލެޖް އޮފް ހަޔަރ އެޑިޔުކޭޝަންގެ ވައިސް ރެކްޓަރ ހުސެން ހަލީމް ވިދާޅުވީ އިންޑިޔާ ސަރުކާރުގެ ފަރާތުން ހަވާލުވެފައިވާ މިޕްރޮޖެކްޓްގައި އެފަރާތުން މަސައްކަތް ނިންމަން އެއްބަސް ވެފައިވާ މުއްދަތަކީ އަށާރަ މަސްދުވަހެވެ.
” އަޅުގަނޑުމެން ލަފާކުރަނީ އެފަރާތުން ދީފައިވާ މުއްދަތުގެ ތެރޭގައި މަސައްކަތް ނިމޭވަރު ވާނެކަމަށް“ ހަލީމް ވިދާޅުވި އެވެ.
ހަލީމް ވިދާޅުވީ ނުވަ ބުރިއަށް އިމާރާތް ކުރުމަށް ހަމެޖެހިފައިވާ މިއިމާރާތް ނިމޭއިރު ކިޔަވައި ދިނުމަށް ބޭނުންވާ ހުރިހާ ވަސީލަތްތައް ލިބެން ހުންނާނެ ކަމަށެވެ.
”މިއިމާރާތުގެ ތެރޭގައި ދަރިވަރުން ނާއި ކިޔަވައިދޭ ލެކްޗަރުން ދިރިއުޅޭނެ ދަނާލަކާއި ފުލެޓްތަކެއް ހުންނާނެ“ ހަލީމް ވިދާޅުވި އެވެ.
އެފަރާތުން މައުލޫމާތު ދިން ގޮތުގައި މިފެކަލްޓީ އިމާރާތް ކުރުމަށް އިންޑިޔާ ސަރުކާރުން 339،674،377،00 މިލިއަން އިންޑިއަން ރުޕީސް ދީފައިވެ އެވެ.
މިއިމާރާތުގެ ސަބަބުން ޖާގަ ދަތިވެފައިވާ މިފެކަލްޓީގެ ތަމްރީނަށް ހީވެސް ނުކުރާހަ ބޮޑު ކުރިއެރުމެއް ލިބިގެންދާނެކަމަށާއި މިމަޝްރޫއުގެ ތެރޭގައި މުވައްޒަފުން ތަމްރީން ކުރުން ވެސް ހިމެނޭ ކަމަށް ހަލީމް ވިދާޅުވި އެވެ.
”މި ޕްރޮޖެކެޓްގެ ތެރޭގައި ހިމެނިފައިވޭ މުވައްޒަފުން ތަމްރީން ކުރުމުގެ ބައެއްވެސް ކުރިއަށް ގެންދާ ގޮތަށް. މިހާރު މީހުން ތަމްރީން ކޮށްދިނުމަށް އެދިފަވާނީ“ ހަލީމް ވިދާޅުވި އެވެ.
ހަލީމް ވިދާޅުވީ މީގެ ދެމަހެއްހާ ދުވަސްކުރިން ފެށިމަސައްކަތުގެ ޢަމަލީ މަސައްކަތް ފަށާފައި ވަނީ މީގެ ދެ ހަފްތާ ދުވަސް ކުރިން ކަމަށެވެ.
މިއިމާރާތް ހަދަމުން ދަނީ މަޖްދުއްދީން ދަނާލުގެ ކުރިމަތީގަ އެވެ.
No comments:
Post a Comment