ސަރުކާރުގެ މުވައްޒަފުންނާ މެދު ސަރުކާރުން އިހުމާލުވަނ

ީ

މުހައްމަދު ރަފީއު އިއްޔެ، 16:27 0 ޚިޔާލު

ސަރުކާރުން ރައްޔިތުންނަށް ފޯރުކޮށް ދޭންޖެހޭ ހުރިހާ ޚިދުމަތެއް ފޯރުކޮށް ދިނުމުގެ ޒިއްމާއަކީ ކުޑަ ޒިއްމާއެއް ނޫނެވެ. މި ޒިއްމާ ކޮނޑުގައި އަޅައިގެން ސަރުކާރުގެ މުވައްޒަފުން މަސައްކަތް ކުރަމުންދަނީ ރައްޔިތުންގެ ޚާދިމުންގެ ގޮތުގަ އެވެ.

މިފަދަ ބޮޑު މަސްއޫލިއްޔަތެއް އަދާކުރަމުންދާއިރު, ގިނަ މުވައްޒަފުން ތިބީ އޮފީހުގެ ހަތަރުފާރުގެ އެތެރޭގައި ބަނދެވިފަ އެވެ. ވެރިންގެ ނުފޫޒުގެ ދަލުގައި ޖެހި އެއިން ސަލާމަތް ނުވެވިފަ އެވެ. އެ މުވައްޒަފެއްގެ ކުރިއެރުމާ ގުޅިފައި ވަނީ އެ އޮފީހެއްގެ އިސްވެރިއެއްގެ ރުހުމެވެ. އެމީހަކު ބުނިހައިގޮތެއް ހަދައިގެން ހަނުހިމޭނުން ހުރުމެވެ.

ސަރުކާރުގެ މުވައްޒަފުންނާމެދު އިހާނެތިކޮށް ކަންތައްތައް ކުރަމުން ދާ ވާހަކައަކީ އިއްޔެއަކު މިއަދަކު ދައްކާ ވާހަކައެއް ނޫނެވެ. ކިތަންމެ ވަރަކަށް އެ ވާހަކަ ދެއްކިއަސް އަޑުއަހާނެ މީހަކު ނެތެވެ. ސަރުކާރުން ކަންތައްތައް ކުރަމުންއައީ ހިތަށް އެރި ގޮތަކަށެވެ. ބައެއް މީހުންނަށް ޕްރޮމޯޝަންތައް މަތިމައްޗަށް އޮހެމުން ދިޔައިރު, ޑިމޯޝަނަކާއެކު މަސައްކަތް ކުރަމުންދިޔަ މާހައުލު ބަދަލުކޮށް, އެހެން ތަނަކަށް ބަދަކުރި މުވައްޒަފުންގެ އަދަދުވެސް ވަކި މަދެއް ނޫނެވެ. ކޮންމެވެސް އިލްޒާމެއް ބޮލުގައި އަޅުވާފައި ވަޒީފާއިން ވަކިކުރަމުން ގެންދާ މުވައްޒަފުން ވެސް މިފަހަކަށް އައިސް އަންނަނީ އިތުރުވަމުންނެވެ.

ޓީވީ މޯލްޑިވްސްގައި މަސައްކަތް ކުރި ތިން ޕޮރޮޑިއުސަރަކު ވަޒީފާއިން ވަކިކުރީ މާބޮޑު ސަބަބުތަކެއް އޮވެގެނެއް ނޫނެވެ. ވަޒީފާއާ ބެހޭ ގަވާއިދާ ޚިލާފަށް ޓީވީމޯލްޑިވްސްއިން އެ ތިން ޕްރޮޑިއުސަރުންގެ ތެރެއިން ދެ މީހަކު ވަކިކޮށްފައިވާ ކަމަށް މަދަނީކޯޓުން ވަނީ މީގެ ދުވަސްކޮޅެއް ކުރިން ހުކުމްކޮށްފަ އެވެ. އެ ކޯޓުން ދިވެހި ސަރުކާރަށް އަންގާފައި ވަނީ ހުކުމްކޮށްފައިވާ ދެ މީހުންގެ ތެރޭގައި ހިމެނޭ ނ. ފޮއްދޫ ހަޒާރުމާގޭ އިބްރާހިމް މުއާޒު ވަޒީފާއިން ވަކިކުރިއިރު, ޓީވީގައި މަސައްކަތްކުރި އެސިސްޓެންޓް ޕްރޮޑިއުސަރުގެ މަގާމަށްވުރެ ދަށްނުވާ މަގާމެއް އޭނާއަށް ދިނުމަށެވެ. އަދި މިއާއެކު ވަޒީފާއިން ވަކިކުރުމުގެ ސަބަބުން ލިބުނު ގެއްލުމުގެ ބަދަލެއްގެ ގޮތުގައި 41,137 ރުފިޔާ ވެސް އޭނާއަށް ދިނުމަށް މި ހުކުމުގައި ބުނެފައި ވެ އެވެ. އެސިސްޓެންޓް ޕްރޮޑިއސަރެއްގެ މަގާމުގައި ހުއްޓައި ޓީވީން ވަކިކުރި އިލްހާމް އަހުމަދަށް ވަޒީފާއެއް ދިނުމަށް ކޯޓުން ހުކުމްކޮށްފައެއް ނުވި ނަމަވެސް އޭނާއަށް ލިބުނު ގެއްލުމުގެ ބަދަލު ދިނުމަށް ކޯޓުން ވަނީ ހުކުމް ކޮށްފަ އެވެ. އިލްހާމަށް ސަރުކާރުގެ ވަޒީފާއެއް ދިނުމަށް ކޯޓުން އަންގާފައި ނުވަނީ ސަރުކާރުގެ ވަޒީފާއެއް އޭނާ މިހާރު އަދާކުރަމުންދާ ތީ އެވެ. ތިން ޕްރޮޑިއުސަރުންގެ ތެރޭގައި ހިމެނޭ އަހުމަދު ޒާހިރުގެ މައްސަލަ މަދަނީ ކޯޓްގައި މިހާރު ވެސް ކުރިއަށް އެބަދެ އެވެ.

ގޮޅާބޯއޭ ކިޔައިގެން ކަސްޓަމްސްގެ ވަޒީފާއިން ވަކިކުރި ރ. އުގޫފާރު ގްރެސަސް, ޔޫސުފު ޒުހުރީއަށް ވެސް އަލުން ވަޒީފާ ދިނުމަށް މިމަހުގެ 25 ވަނަ ދުވަހު މަދަނީ ކޯޓުން ވަނީ ސަރުކާރަށް އަންގާފަ އެވެ. އޭނާ ވެސް ވަޒީފާއިން ވަކިކޮށްފައި ވަނީ ވަޒީފާއާ ބެހޭ ގަވާއިދާ ޚިލާފަށް ކަމަށް މަދަނީ ކޯޓުން ކުރި ހުކުމުގައި ފާހަގަކޮށްފައި ވެ އެވެ.

ގދ. ރަތަފަންދޫ ޗަބޭލީވިލާ ޒަހީނާ ރަޝީދު, އެޓޯލްސް މިނިސްޓްރީގައި އަދާކުރަމުން ދިޔަ ވަގުތީ ވަޒީފާއިން ވަކިކޮށްފައި ވަނީ އެމްޑީޕީން ރާވާހިންގި ” ދިހައެއް ނޮވެމްބަރުގެ ހަރަކާތުގައި“ ބައިވެރިކަމަށް ބުނެ އެވެ. މަދަނީކޯޓަށް މި މައްސަލަ ހުށަހެޅި އެކޯޓުން ވަނީ އޭނާ ވަޒީފާއިން ވަކިކޮށްފައި ވަނީ ގަވާއިދާ ޚިލާފަށް ކަމަށާއި, ވަޒީފާއިން ވަކިކުރުމުގެ ސަބަބުން ލިބުނު ގެއްލުމުގެ ބަދަލުގެ ގޮތުގައި 61,400ރ ފަނަރަ ދުވަހުގެ ތެރޭގައި އޭނާއަށް އެޓޯލްސް މިނިސްޓްރީން ދިނުމަށް ހުކުމްކޮށްފަ އެވެ.

ޑީއާރުޕީން އައްޑޫގައި ބޭއްވި ޖަލްސާތަކަށް ހުރަސްއެޅުމަށް މަސައްކަތް ކުރި ކަމުގެ ތުހުމަތުގައި ވަޒީފާއިން ވަކިކުރި އައްޑުއަތޮޅު މަރުކަޒީ އިންޖީނުގޭގެ މެނޭޖަރ ގދ. މަޑަވެލީ ހިރުދުމާގޭ މުޙައްމަދު ޒުހައިރަށް ސާދަ ދުވަހަށްފަހު, އަލުން ވަޒީފާ ދިނެވެ. މީނާއާ އެކު, ގޭގައި މަޑުކޮށްލަން އެންގި އެސްޓީއޯ ހިތަދޫ ފިހާރައިގެ މެނޭޖަރު އިބްރާހިމް އަލިދީދީ ވެސް ވަނީ އަލުން ވަޒީފާއަށް ނެރެފަ އެވެ.

ޒުހައިރު ވަޒީފާއިން ވަކިކޮށް, އަލިދީދީ ގެއަށް ފޮނުވާލާފައި ވަނީ އެޕްރީލް މަހުގެ 15 ވަނަ ދުވަހު އެވެ.

ޒުހައިރު ވިދާޅުވީ އޭނާ ވަޒީފާއިން ވަކިކުރި ލިއުމުގައި ބުނެފައި ވަނީ ރިޕޯޓްތަކަށް ބަލާއިރު ވަޒީފާގައި ބެހެއްޓެން ނެތިގެން ވަކި ކުރީ ކަމަށެވެ. އަލިދީދީ ވިދާޅުވީ އޭނާ ގެއަށް ފޮނުވާލީ ސަބަބެއް އަންގާފައި ނޫން ކަމަށެވެ. އަންގާލަންދެން ގޭގައި މަޑުކޮށްލަން އޭނާ އަށް އެންގި ކަމަށާއި އެއީ ކީއްވެގެން ކަމެއް އޭނާ އަކަށް އެނގިވަޑައިނުގަންނަވާ ކަމަށެވެ.

ހިތަދޫ ފިހާރައިގެ މެނޭޖަަރަކަށް ހުންނެވި އަލިދިދީ 25 ދުވަހު ގޭގައި ބެހެއްޓުމަށްފަހު, ވަޒިފާއަށް ނެރުނީ ގަމުގައި ހުންނަ އެސްޓީއޯ ތެޔޮފިހާރައިގެ މެނޭޖަަރުގެ މަގާމަށް މިމަހުގެ 10 ވަނަ ދުވަހު ބަދަލު ކުރުމަށްފަހު އެވެ.

ޖަޒީރާއަށް މައުލޫމާތު ލިބިފައިވާ ގޮތުގައި ވަޒީފާއިން ޒުހައިރު ވަކިކޮށް, އަލިދީދީ ގޭގައި މަޑުކުރަން އެންގީ ޑީއާރުޕީން އައްޑޫގައި ބޭއްވި ޖަލްސާތަކަށް ހުރަސް އެޅުމަށް ބަޔަކު ކުރި މަސައްކަތަށް ހިތްވަރު ދިން ކަމަށް ބުނެ އެވެ.

މިކަމާ ގުޅުން ހުރި ކަމަށް ތުހުމަތުކޮށް, ގަމުގައި ހުރި އެސްޓީއޯ އޮފީހުގެ ޑިޕިއުޓީ ޑިރެކްޓަރެއްގެ ގޮތުން މަސައްކަތް ކުރެއްވި ފޭދޫ މޮހޮރީގޭ މުޙައްމަދު ރަޝީދު މޫސާވެސް ވަނީ ވަޒީފާއިން ވަކިކޮށްފަ އެވެ.

ސަރުކާރުގެ މުވައްޒަގުންނަށް މިފަދަ އިހާނެތިކޮށް ކަންތައްތައް ކުރަމުން އަންނަކަމަށް ހިއުމަން ރައިޓްސް ކޮމިޝަނުންވެސް ވަނީ ބުނެފަ އެވެ. އެ ކޮމިޝަނުން ބުނީ ބައެއް ފަރާތްތަކާމެދު ސަރުކާރުން ވަރަށް އިހާނެތިކޮށް ކަންތައްތައް ކޮށްފައިވާތީ އެކަންތަކާމެދު ފިޔަވަޅުއަޅާ ބައެއް މީހުން ވަޒިފާއަށް ނެރުމަށް އެ ކޮމިޝަނުން މަސައްކަތް ވެސް ކޮށްފައި ވާ ކަމަށެވެ.